Luk 21 | AEY | STEP | Odocob Jisas qaalimei uqa cehewanagaca age meen qaig helecnu tempel bokis meen qaig memegin meciaden.

Luke 21

Caja wij Anut meen qaig nag lecis uten

(Mak 12.41-44)

1 Odocob Jisas qaalimei uqa cehewanagaca age meen qaig helecnu tempel bokis meen qaig memegin meciaden. 2 Odimei uqa caja wij sawen osoha meen qaig nag lecis memen fen. 3 Odocob uqa maaden, “Dana caja cehewanagaca age cehewanaga bennadec meen qaig heleiga qa caja wij i uqa sawen bahic, uqa uqana ceteh cebac bilecnu meen qaig cunug heleia. Eunu ija mele maadigina, caja wij sawen i uqa meen qaig nag heleia eu cehewanagaca age tempel bokisna meen qaig ben bahic heleiga cunug wooladena,” aden.

Jisas age tempel wagaloqagan ec maden

(Matju 24.1-2; Mak 13.1-2)

5 Odocob dana leih age tempel uqana meen soidocca fecnu me bahic, odocob bagol gagaca mudein euha fecnu me bahic eunu mamadegin Jisas maaden, 6 “Ceteteh i cunug fegina eu saen caleceb meen gel ulugedocob meen oso meen oso tatacanna cilehdoc qee biliaun. Cunug wagalecebil mahana tonoqagan,” aden.

Jisas culumen mati bahic caloqagan ec maden

(Matju 24.3-14; Mak 13.3-13)

7 Odocob eu age sisildoin, “Iwalgec, aadeb eu odi caligian? Odocob cel gaga casac camas meceb saen wele dodoldona eu ege docnu ihoc?” doin.

8 Odocob Jisas maaden, “Matica age ija ijanina mamadi hoqagan, ‘Ija uqa,’ oqagan. Odocob ageha madoqagan, ‘Saen wele hoia,’ oqagan. Euqa cain tooadowain. Eunu oso hu faninadi dado madeceb agena jic ceja qocna lowainnu batut feigale. 9 Han ben saen falicfuluc eu casac caloqagan. Euqa cit qoc eu mahuc qee toodu hoiaun. Eunu age ceteh eu hona ec dah moqagan saen euna cain cucuiuwain,” aden.

10 Odocob uqa odi maaden, “Dana hatuhatu age cajimeig cilehdocobcilehdocoboqagan. Odocobil dana sihulsihul age cajimeig cilehdocobcilehdocoboqagan. 11 Mim benben mahana nigian. Sabnu cahel bilec saen maha filfilna cali hugian. Odocob hag gug filfil mahamaha ihoc ligian. Sao jobondec ono gaga meca caca ceteh filfil cacaleb foqagan eunu ben bahic cucuiuqagan. 12 Euqa ceteh eu cunug qee calec ninijeb age hewadimeig me qee madoqagan. Age Juda agena cuha jo dunuh um aqimeig gihacdoc jona madoqagan. Age ija ijaninu kingca, hatu cofdocca ehadi li amagana madoqagan. 13 Saen eu age ijana me je qasali maadecnu saen. 14 Ijadodoc je adi madoqagan eu conogana migen. Odocob doc meca je madoqagan eu agena cad eundec age je mele qee madegina ec madecwe qee, age jejenega hewi maadecwe qee. Eunu age amagana agedodoc cesuladec je adi madoqagannu cain casac saciadowain. 16 Age memegailca, anagailca, walinigailca, agena sihul eundec agena danahca eu age agena cad ebenegana madoqagan. Eu age agenadec leih dewenega tudocobil age cal moqagan. 17 Age ija ijani hewegina eunu dana cajaca cunug age agenu gemanaga beceb sagagadoqagan. 18 Euqa age dewenega cunug Anut uqa cahahadugian. Gosiniga osol himecha age ilomoganadec qee fadaleiaun. 19 Age wawaga gagadic tawoqaganna agena cebac bilec catanec oqagan,” aden.

Jisas age Jerusalem fadaldoqagan ec maden

(Matju 24.15-21; Mak 13.14-19)

20 Jisas je haun maaden, “Saen euna eu ‘Fileec Ameg Oc Saen,’ je cunug Anutna jaqec jena taweia eu aig ihoc ligian. Eunu saen age han dana am Jerusalem alildocobil fifeig age taun ben eu nag odi fadaldoqagan ec ihoc cisdoqagan. Eunu leih Judia hatuna bilegina age busali aluhnana toboigale. Leih Jerusalem dunuh bilegina age taun ben eu culdoigale. Odocob leih cabina cobogina age taun benna cain ceseli belowain. 23 Saen euna caja waugca coboc, caja mel su adegina eundec age walocca bahic biluqagan! Ge, saen euna culumen ben bahic mahana caligian. Odocob Anut olohon dana cajaca i age oqagan. 24 Leih age han siginna cal moqagan. Odocob leih gihacdoc dana cinigwe hatu cunugna ehadi beloqagan. Odocob Juda dana qee eundec age jaimagana Jerusalem lahacdoqagan odi tatawebil li agena saen ihoc ligian,” aden.

Dana Melah ceseli nigian

(Matju 24.29-31; Mak 13.24-27)

25 Jisas je haun maaden, “Gaga filfil camna, jagelna, malaqana caligian. Odocob hatunana dana caja cunug jaen ben aqigian. Odocob macas silca qaqahi udududoc eunu cucuiuqagan. 26 Saona gagadic odoc eu caji leceb hocob qeleloqagan. Eunu dana cajaca age cucuieeig maha ina ceteh caligiannu geh cisdoqagan. Odocob amaga ha waldugian. 27 Eu odi cali hedocob Dana Melah uqa gagadic odoc kobolkobolca bahic uqa taen osona neneb foqagan. 28 Aria, ceteteh eu odi sanan mi cacaleb saen euna Anut age cahahaadecnu saen dodoldonanu age caji tawimeig ilomoga suleiga,” aden.

Na dan fifeig saen doqagan

(Matju 24.32-35; Mak 13.28-31)

29 Odimei uqa galolo je oso maaden. Uqa maaden, “Age na dannu cisdoiga. Na cunugnu ha cisdoiga. 30 Saen age cilonca fegina eu cam saen me bahic caligian dodoldona ec dogina. 31 Eu odi himec age ceteteh eu odi cacaleb fifeig age Anutna cul wele dodoldona eu doqagan,” aden.

32 “Ija mele maadigina, sihul i qila bilegina qee cal mi hedoc ninijeb ceteteh eu cunug caligian. 33 Sao mahaca qee migian euqa ijana je qee qee meiaun,” aden.

Malogom cunug age cofdoiga

34 Jisas je haun maaden, “Euqa ceteteh maha inadecnu cain cisdowain. Cain ja ben qowain. Cain dalul aqeiaun. Maha ina cebac bilecnu cain jaen aqeiaun. Agedodocnu cofdoiga. Qeefi, Gesilec Deel Ben eu mahuc ageca bolob cinigwe hugian. 35 Deel eu dana cajaca maha cunugna bilegina ageca caligian. 36 Saen cunugna saciadoc bileiga. Odocob gaidgaid Anut gagadic odoc adigiannu sisildoiga. Eu odina age ceteh cunug ageca caligian eu ihoc wooldoqagan. Odocob age Dana Melah olana tawoqagan,” aden.

37 Odocob deel cunugna Jisas dana cajaca tempelna iwaladoloi. Wesuna uqa nui Oliw Aluhna ono us nijoloi. 38 Odocob dana cajaca cunug qasil wele cajimeig tempelna ono uqana je dah moqagannu uqaca loloig.